www.hafdal.dk

Eftir að hafa sloppið við það að slá garðinn í nokkra daga vegna þurrks, kom að því að það rigndi í fyrradag og grasið tók þvílíkan kipp. Þannig að það var ekkert annað að gera en að slá garðinn og ég dreif mig bara í það. Í fyrsta hringnum var ég að koma að einu blómabeðinu og sé þá snák renna upp úr grasinu, yfir kantinn á beðinu og upp í blómabeðið. Þar hvarf hann svo. Ég skrækti eins og stunginn grís og kallaði á Hönnu Sif sem kom hlaupandi alveg í sjokki. Mig dauðlangaði að ná honum og dreif mig að finna hanska því mig langaði ekki að vera berhent að meðhöndla hann, en mér tókst því miður ekki að finna hann aftur :-(

En núna kemst ég víst ekki hjá því að fara að hreinsa til í beðinu, því Hanna Sif varð ekki hrifin af því að heyra af snáknum. Hún kvartaði reyndar undan því að ég hefði hrætt hana með því að vera að skrækja svona, en ég lofaði því að næst myndi ég bara skrækja ef að ég hefði klippt af mér tærnar með sláttuvélinni eða álíka, amk yrði nóg af blóði ;-)

Annars er bara allt rólegt, dáldítið rok í dag, en þurrt. Svo spáir víst 25 stiga hita um helgina, en þá erum við að fara tónleika!! Rock on! (eða þannig…)

Við komum loksins einhverju í verk í dag, helgin fór að mestu leyti í að sóla sig og svamla í lauginni. Hitinn fór upp í 31°C í skugga á sunnudeginum og það segir sig sjálft að það er ekki hægt að vera að vinna í þeim hita hehe. Ég gerði amk heiðarlega tilraun til að moka holu fyrir síðasta girðingarstaurinn, en komst bara hálfa leið, gafst upp og fór í sundlaugina :P

En í dag þá fór kellan mín í að mála grindverkið á meðan ég fór í að saga ofan af staurunum og árangurinn má sjá hér að neðan. Svo eru fleiri myndir á myndasíðunni okkar, m.a. myndasería af Dúllu “Banks” KNTP - eða semsagt Kegnæs Next Top Model :-)

Eftir hitann síðustu daga vorum við farnar að örvænta, sundlaugin ekki væntanleg fyrr en á morgun og helgin á víst að vera alveg þokkalega heit (spáin segir um 25°C). Það var svo ekki til að bæta það að hitinn fór upp í 27,5°C í gær (í skugga) og m.a.s. Hanna Sif var hætt að geta legið í sólbaði vegna hita. Þannig að ég ákvað að fara út í búð og spyrja hvort að sundlaugin væri nokkuð komin og viti menn - hún var barasta komin!!!

Ég brunaði heim með hana og svo var bara farið í að pumpa og láta renna vatn í hana. Sem betur fer fjárfestum við um daginn í rafmagnspumpu því ég svitnaði bara við að sitja og halda á henni - veit ekki hvernig þetta hefði verið ef ég hefði þurft að fara að pumpa sjálf í hehe. Svo endaði með því að pumpufjandinn bræddi úr sér! Það var náttúrulega ekki mikil loftkæling og þrátt fyrir að ég reyndi að halda henni í skugga þá varð hún alveg logandi heit. En ég náði amk að blása upp það sem ég þurfti. Þetta er dálítið stór sundlaug - stærri en ég átti von á, þrátt fyrir að hún sé helmingi minni en sú sem við vorum með í fyrrasumar. Ætli maður minnki ekki ennþá við sig næsta sumar (ef frúin samþykkir það). Við náðum nú ekki að klára að láta renna í hana þar sem við þurftum að fara í bæinn að versla aðeins fyrir helgina, en þetta gengur ágætlega enn sem komið er.

Planið fyrir helgina er annars frekar þéttskipað, sem betur fer er þetta löng helgi og ég býð nú ekki í þetta ef að það er 25 stiga hiti. Þá verður nú ekki gaman að vera að stinga upp og hamast! Ætli maður verði ekki bara eins og spánverjarnir og fái sér siestu í mesta hitanum hehehe.

Hún konan mín er búin að hafa yfirumsjón með fínpússun á pallinum og eftir mikla þrif og málningarvinnu er pallurinn loksins búinn að fá ok-stimplinn og við byrjaðar að punta aðeins upp á hann. Þetta er orðið rosalega kósí og við erum búnar að vígja hann með því að grilla og borða úti á honum í gær ;-)

Ég stóðst ekki mátið að steypa nokkra kantsteina í viðbót upp við grindverkið. Nú eru ekki margir eftir og þetta er bara að verða asskoti flott :-)

Við fórum og keyptum tvenns konar blómategundir í dag til að punta aðeins upp á palllinn og blómakerið í garðinum. Við keyptum eina stóra hortensíu sem á að fara í hornið á pallinum og svo keyptum við blóm sem heita “exacum affine” eða persian violet og þær eiga að fara í blómakerið. Þetta hlýtur að verða voða fínt :-)

Hortensían stóra

Persnesku fjólurnar

Svo er eplatréið að komast í fullan blóma, það hljóta að koma nokkur epli á það í ár :-)

Þá er enn einn frábær dagur búinn. Við byrjuðum nú frekar rólega, ég skrapp í bakaríið rétt fyrir 8 og við fengum okkur nýbökuð rúnstykki í morgunkaffi…nammi namm! Svo horfðum við á eina mynd (fórum á Blockbuster í gærkvöldi) sem ég var nú ekkert allt of hrifin af. Minnir að hún heiti Match Point og er leikstýrð af Woody Allen. Ég er ekki mikið fyrir svona myndir þar sem maður bíður bara eftir því að allt fari í háaloft, en við spóluðum bara yfir leiðinlegu kaflana og þá reddaðist þetta ;-)

Uppúr hádegi fórum við svo út. Ég fór í að steypa kantinn á innkeyrslunni (þar sem maður keyrir inn í innkeyrsluna) og Hanna Sif fór að mála og liggja í sólbaði ;-) Hitinn fór í ca 20 gráður í skugga þannig að það varð frekar heitt að vera að púla í steypuvinnu, en þetta hafðist allt á endanum. Þar sem að við erum búnar að vera að keyra upp í innkeyrsluna á lausar hellur, þá þurfti ég að taka slatta af þeim upp, hreinsa sandinn af þeim og svo slétta og leggja þær aftur. Annars hefði fúgubreiddin verið allt of stór og misjöfn og það gengur náttúrulega ekki ;-)

Eftir að ég var búin að klára alla steypupokana sem ég keypti í gær (6 stykki), þá var klukkan nú orðin frekar margt og eiginlega kominn tími á kvöldmat, en ég stóðst ekki freistinguna og sagaði ofan af einum stólpa ;-) Mig langaði bara til að sjá hversu vel það myndi ganga nefninlega ;-)
Það gekk bara vel og þegar ég var búin að því, kveikti ég upp í grillinu og skellti kartöflunum á. Meðan þær fengu að hitna aðeins, rúllaði ég svo yfir gólfið á pallinum, síðustu umferðina!! Jei!! Svo fór svínakjötið á grillið (nei engar pulsur í þetta skiptið) og þetta bragaðist bara svona líka frábærlega!!

Konan mín missti sig aðeins í málningarvinnunni, þannig að hún fór bara beint í háttinn eftir matinn og ætli það fari ekki að styttast háttatímann hjá mér líka :-)
Fleiri myndir á myndasíðunni (eins og alltaf!).

Já svo kláraðist steypan, en þar sem mig vantaði ekki verkefni var það allt í lagi. Ég fór í að mála grindverkið, þeas hliðarnar fyrir neðan hurðina.

Dagurinn var tekinn snemma hér í sveitinni og fyrst var farið í innkeyrsluna, þröskuldurinn steyptur og svo hélt ég áfram með að steypa kantsteina upp hallann. Þetta er allt að koma og verður bara flottara og flottara :-)